PARINKI NALAKA FIMIN

Ma’tu mate tsa’chila wa jelen ke’tsabi ya ki’to chumin jumilanue. Junin jun malate duke jelen chi’tela chumilanue, tsankenan wa Parinki chuminue in Parinki nalaka fimin juminue kasan naikajunka junshi man wa’ta tan nalaka.

Tsa’chi sona na kinushile in tso’tso naka mankashirin yabi puratunun juminue palu maka, e’perin mohora Parinki jashi naka tanji’min juminue fi’chun.

Junin ma’tu mate tsa’chila manchi manchi ya ki’to chuno mi tamilanue. I’tsanke ino pa’ti min juminue yala chunun postote bolon jumin bi nechi manka piyakajunan, tsankenan fe jelen to tsominka jayake kachike jun tsankenan ma’tute bolonle jera jimin jumilanue jelen pe’ke neyabi aman wa’tsa kabi, junshi wi’ta kina’to titi wa’kena’to junchi ya ki’to chudimin jumilanue.

Tsa’chi bolonla palu hora nufirinka nedechi jimin jumilanue jelen tenka ke’tsase jun jina’to chi’telaka parejo tanjimin jumilanue jelen chi’te yate ta’to mishuakalaka inla joe: kuru, kiwi, wa’sa, ye junshi yate chumin chi’tela ku’chi, walpa aman shushula.

Tsa’chi sonala naka be’tendebi tsanpa pi’tichi panato washuwaminla joe jun tsankenan ya bi titi kina’to a’no dakin, ta’pe kashin naka panato jera kiminlajoe, aman wi’tabi titi ki’chun naka panato titi pe kiminlajoe, junan jelenchi jina’to ayan naka panato junshi chalinachi shidanto tanji minjoe.

Tsa’chi unila wa jelense tu’ka i’to ka’ke jiminjoe minuka tukaride, junan jun tsanke jelense ji’nasa a’pala ten i’tusale in wa Parinki no’sa ora kirakade bene tanjiminjoe wa chide pele jamobi nechi, tsanke nedechi jide jilai’nasa in Parinki jun neka pe jiminjoe a’pala ten i’tusale mohora shupa’tito naka ka’chun.

Tsa’chi bolonla nunchi jinanun postobi fe’to jayakebi, wa’tsa kabi, jelen pe’ke neyabi nunchi junanti na a’pa kasele Na kuyanka sepa’tariminjoe naka tsorechun jun kuyan tenpe, tsankenan nana lowa nakan na’ka na mi’chi intsanshika jun kuyan tenpe puminlajoe piranchi mumunka, junbi aman naka tsoreminlajoe yaka aman juinki, juikin min jumilanue na in Piranchibi ora sele numarinka ka’tsosa.

Tsa’chi a’pa titi kinasa mohora in Parinki shupa’tito ya’chi teyan newechi numa naka kamantie jun kashi wa chide pele jamobi tan lo mantie naka fi’chun jun jamobinechi naka numa fimantie, a’pala la’kichi ati’to warelakinassa na tsanpa pi’tika aman piranchika shirin mera darapa’taremantie.Tsanke ma’tute Parinki nalaka fimantie

Junan debi pa’to tsa’chi bolonla duke nalaka kirato aman tenkabe tamin jumilanue sei’ton oko tsanla tui’tusa junshi Parinki fi’tusa. In parinki wa ayanka Jolio na kiran juman tie wa tewe tan junshi ja’chi chune kiwi chune na kiran tamantie. Tsanke ma polede jikajoe junin amana mate tsa’chi tobi i’tonjoe in Parinki jera piya polekajoe wa jelen i’tonan tsainan mate wi’ta kikajun to shirin joe.