BULAN

Tsa’chila ma’tu mate mi tamilanue bulan mera atinasa bulan, bulan, bulan, bulan ke’pen ya awinta atina’sa sei’toto tsantiman e timinlajoe. Junin tsa’chila mi talae tsanke bulan meratinanan bolon binechi manka piyasa tsantiman e timinlajoe.

Tsankenan ma’tu mate tso’tsoka nalaka jelenchi tan nena’tumin jumilanue junin tsa’chi michi in bulan nalachi tenkaka o’kobe fimin juminue, in bulan jelen ke’tsabi junshi pa’ki bolonbi chumin junjoe.

Tsanke o’kobe in bulan nachi tenkaka fikajunan ku’para isakarimin juminue, ka’tsa kisakarin naka. Junan tsan juminka ten i’to a’pala naka we Ponechika tanjiminlajoe Junin Pone mohora mi iminjoe junshi a’palabe paminjoe Bulan tsanke ya keloka atina’to nachi tenkaka o’kobe fikajoe juntechi na ku’para, ka’tsa kin aman tenka kiyatinaeke mi iminjoe.

Junan tsanke Bulan mera atina’to na’chi tenkaka fiminjoe juntechi na piyamin juminue ma’tute. Tsanke pulenanan wiyan a’pala we we naka ponechika tanjimin jumilanue pi’kishisakaribi naka man seshuwasa.

Junan Poné Tsa’chi manta kiminjoe ya awintaka jera shinukisa titi jera layato: muturu je’ken japishu, wala chide, pinku je’ken japishu, dondo, waranta, juluka, junshi chivi tun in laka jera palato ninpu nun juminue jun tsankishi shinu kikajun ya awinta aman tsankenan ka’ma japishuchi dokimin jumilanue fe poyo serasa nufirinka puban josa yape in bulan uyanchi man shujisa.

Tsainan mate tsa’chi tobi ma’tute kuenta jelen to i’ton puraikala joyoe, duke wi’ta kina’to jelen tsominka jera jayakilajoe titi wa’ke’chun. Junin i’tsanke ide jana’to amana mate jelen jera piyapolekajoe jun parejunan chi’tela jeraide jikala joe Tsainan mate in Bulan manka manka ka chue juntonan Poné janpeka tenchi ma’tu kuenta nalachi tenkaka nati fi’tuminjoe, tsanke panshile ya keloka meratimin joe wiyante wiyante ati’to junan ya ma’tute mi ka talayoe la’ki i’to meranun joe mo bolonbinechi nien ilaichinayo e tinunjoe inin piyasa tsanke meratiminjoe. Juntonan ina rae in ma’tute pi’chula jera piyapolechun.

Junan debi pa’to kirato in ma’tute mi kuentalaka duke minlajoe chilachi ma’tute uwanla ka sonraminla. Jokachirin duke fi’ki joe, juntonan tsarshika in ma’tute kuentaka min jolajoe chilachi ta’tala junshi mamala komuna tenpe chuminla. Junin uwanla tsantimin lajoe in to tenpe To Ayan chuntieke junshi tsankenan tsa’chi michi chi’tela jolajoe ma’tute fi’ki tanla.

Tsanke ma’tu to kuenta fi’kika panshide jilainayoe, ma’tute uwanla nalaka man bolorin shuwato kuenta ki’to merawomin jumilanue, juntonan amana mate kasan nala wainaminla i’tsan fi’kila nati merano muna i’tonlajoe. Tenka ka’to kirana sejunoe Tsa’chi manka, tsa’chi pila yalabi in ma’tute fi’kila kuenta ki’to merawosa nalachi.

Junin duke se junoe in ma’tu to kuentaka bolonkura yabi in fi’kila pa’to merawosa tsainan nalalanlaka, in ma’tu to fi’kika panshituchun. Jun tsankenan jera ma’tute kuenta juminka pilabi chu’te’to kirawono se joe in fi’kilaka kuenta ki’to tsainan tsa’chi nala wainaminka man munakarede ji’chun, tsanke ki’to chilachi mi junoka man sonba larikai’chunae.